Ballina Politikë PD denoncon shkarkimin e policëve se arrestuan kunatin e Tahirit

PD denoncon shkarkimin e policëve se arrestuan kunatin e Tahirit

Partia Demokratike ka denoncuar shkarkimin e shtatë policëve, sepse arrestuan kunatin e ministrit të Brendshëm, Saimir Tahiri. Përmes një deklarate për mediat, kreu i Departamentit për Rendin dhe Sigurinë, Alibeaj tha: “Një muaj më parë, një biznesmen në Tiranë denoncoi publikisht dhunën e ushtruar ndaj tij dhe ndaj djalit të tij, nga policia në qendër të Tiranës. Gjithçka nisi për një gjobë makine të papaguar. Edhe pse biznesmeni i njohur dëshmoi me prova arrogancën dhe dhunën brutale të policisë, tejkalimin e çdo norme, asnjë masë nuk mori Saimir Tahiri, askush nuk mbajti përgjegjësi. Po nëse dikush, një polic prek kunatin e Saimir Tahirit, ky do të jetë fundi i tij, fundi i karrierës dhe do ta shohë veten në rrugë. Kjo ka ndodhur këtë fundjavë në Tiranë, ku 7 oficerë policie janë flakur, sepse reaguan ndaj kunatit të Saimir Tahirit, i cili, iu vërsul policëve me arrogancën tipike të familjarëve të qeveritarëve me pretekstin se po i prishnin qetësinë dhe relaksin në lokalin e tij. Paçka se policia gjendej aty në një aksion e sinjalizuar për praninë e një personi të armatosur.
Policia nuk e dinte se kishte të bënte me kunatin e Tahirit, dhe nuk e dinte se po kalonte vijën e kuqe. Sepse Tahiri dhe kunati i tij janë përtej vijës së kuqe, ata janë të paprekshëm. Të paprekshëm si njerëzit e Tahirit, janë jo vetëm familjarët e tij, po dhe bandat, trafikantët, rrëmbyesit, grabitësit, e sidomos habilajt, kordinatorët kombëtarë të drogës në vend”, tha Alibeaj në deklaratën e tij. Gjithashtu, kreu i Departamentit të Rendit dhe Sigurisë në PD tha se padrejtësisë nga keqqeverisja Rama po i vjen fundi.
“Përtej vijës së kuqe dhe të paprekshëm e shohin veten Tahiri e Rama me përgjimet e tyre të paligjshme dhe presionin kriminal ndaj Prokurorisë e Gjykatës kur nis hetimi ndaj tyre. Dy standardet e dëshmuara haptazi nga Saimir Tahiri, ku për dhunën e shëmtuar e brutale ndaj një biznesmeni të rregullt e djalit të tij s’merret asnjë masë, madje pas denoncimit publik vazhdon përndjekja e mëtejshme ndaj tij, ndaj aktivitetit të tij, dhe nga ana tjetër, për një reagim ndaj kunatit të Saimir Tahirit, teksa policia gjendej në aksion, hidhen në rrugë 7 policë, këto dy lloj standardesh janë fytyra e vërtetë e qeverisë, e Tahirit, e Ramës, e kësaj oligarkie që po sundon prej tre vitesh. Kjo padrejtësi bashkë me burimin e saj që është qeveria, janë drejt fundit”, shprehet Alibeaj në reagimin e tij.

Exit mobile version