Basha: Beteja vazhdon deri në largimin e Ramës

Kryetari i PD, Lulzim Basha deklaroi dje se beteja kundër të inkriminuarve do të vazhdojë deri në largimin e Ramës, personit që ngriti pushtetin e inkriminuar me votën e lirë të qytetarëve. Përmes një prononcimi për mediat, Basha e cilësoi dje dorëheqjen e Elvis Rroshit nisjen e efekteve të ligjit për dekriminalizimin, duke e cilësuar këtë të fundit si një  nga arritjet më të rëndësishme.  Basha solli në vëmendje faktin se Rama e mbrojti Rroshin edhe kur mediat botuan fakte të pakontestueshme duke sfiduar hapur edhe partnerët ndërkombëtarë, të cilët bënin thirrje për largimin e të inkriminuarve nga listat e kandidatëve për  kryetarë bashkie.
“Është një ditë e rëndësishme për një nga reformat më të rëndësishme në Republikën e Shqipërisë në këto 25 vite, më të rëndësishmen të këtyre 3 viteve, që ka vulën dhe firmën e Partisë Demokratike, por mbështetjen e çdo shqiptari të ndershëm: ligjin për dekriminalizimin.
Efektet e këtij ligji kanë filluar të ndjehen dhe sot Elvis Rroshi, si subjekt i deklaruar dhe i njohur botërisht i këtij ligji ka marrë atë që ligji i rezervon atij dhe personave të tjerë të veshur me pushtet, për shkak të rekordeve të tyre kriminale.
Kjo është koha të kujtojmë se para se të vinim tek ky hap i rëndësishëm Elvis Rroshi kishte mbështetjen e plotë dhe të gjithanshme të Edi Ramës në kandidimin e parë dhe në kandidimin e dytë. Edhe kur “BIRN”-i i kujtoi se ka dënim në Zvicër për trafik droge, edhe kur Shtetet e Bashkuara të Amerikës i kërkuan të mos e poshtërojë popullin shqiptar,  Edi Rama vendosi të rrinte pas dhe me Elvis Rroshin, të sfidonte komunitetin ndërkombëtar,  popullin shqiptar, popullin e Kavajës, t’i poshtëronte ata” u shpreh Basha.
Kreu i PD bëri të ditur se edhe dje kur Elvis Rroshi dha dorëheqjen, Edi Rama gënjeu ndërsa në një deklaratw tw gjatë për mediat, që dukej gati si një hartim mohoi dënimet penale të Rroshit ndërsa shprehu edhe njëherë mbështetjen ndaj tij.
“Poshtëruesi i popullit shqiptar ka një emër dhe mbiemër dhe ky quhet Edi Rama dhe sot siç i poshtëroi dhe i gënjeu për Elvis Rroshin përsëri i gënjeu për hesap të Elvis Rroshit, por edhe për hesapin e vet.
Elvis Rroshi ka një dënim në Zvicër për trafik droge. Elvis Rroshit që nuk i kujtohej dënimi në Gjermani, deklaroi më pas se nuk kishte asnjë dënim dhe po kështu tha edhe shefi i tij dhe tani papritur i është kujtuar dënimi në Itali. Por ka edhe një dënim në Zvicër. Ai mbetet subjekt i ligjit të dekriminalizimit sepse i ka fshehur këto dënime” theksoi Basha.
Edi Rama e ka ditur si sot një vit më parë, që Elvis Rroshi ka dënim në Zvicër për drogë. I është kërkuar të mos e kandidojë se do të poshtëronte popullin e tij duke kandiduar një të dënuar për drogë dhe zgjodhi ta kandidonte.
Nuk është një ditë për të fërkuar duart. Është një ditë për të parë se ku e ka katandisur Shqipërinë Edi Rama me të inkriminuarit e tij që janë cep më cep, në çdo cep të administratës, nga jugu në veri, nga nivelet më të ulëta tek nivelet më të larta të administratës që Edi Rama e ka mbushur me persona me rekorde kriminale” u shpreh kreu i PD.
Basha theksoi se dekriminalizimi nuk zgjidhet me thjeshtë dhe vetëm me largimin e Rroshit por ai paralajmëroi se ligji do vijojë të largojë nga administrata publike shumë e shumë persona të inkriminuar ndërsa theksoi se zgjidhja dhe fundi i gjithë kësaj situate të papreçedent është largimi i Edi Ramës.
“Por ndryshe nga ç’thonin dhe parashikonin dajrexhinjtë e tij në studiot televizive dhe në media, ligji funksionon. Elvis Rroshi është prova e parë që ligji funksionon. Dhe me shprehjen më të dashur të tij:  “S’ka parë asgjë akoma!”. Ligji do të vazhdojë të nxjerrë në pah krimin më të madh që ka firmën dhe vulën e Edi Ramës: kërkimin me zor dhe gradimin me zor të kriminelëve në administratën publike, në Parlament dhe në bashkitë e vendit.
Por ky  problem nuk zgjidhet me largimin e Rroshit. Ky duhet të largohet. Ky që i poshtëroi shqiptarët, ky që i gënjen shqiptarët ditë e natë. Ky që i ka zhytur shqiptarët në një krizë ekonomike të thellë dhe me cinizëm iu thotë sot që kriza është thelluar, siç e konstatojnë edhe institucionet ndërkombëtare financiare, se krizën po e lëmë pas me pranverën.
Largimi i Edi Ramës është zgjidhja. Ai duhet të mbajë përgjegjësi para shqiptarëve për inkriminimin e vendimmarrjes në këtë vend si kurrë më parë, për gradimin e kriminelëve me pushtet, për gënjeshtrat dhe mashtrimet që iu ka thënë shqiptarëve ditë për ditë në emër të kriminelëve që i gradoi me pushtet. Zgjidhja është largimi i Edi Ramës, pasi shqiptarët e dinë se e keqja me të do të vazhdojë, se mbrojtja e kriminelëve do të vazhdojë, siç vazhdoi mbrojtja e Elvis Rroshit deri në minutën e fundit, sa kohë që kanë garant Edi Ramën” tha ndër të tjera Basha.
Ai theksoi se zgjedhjet e lira dhe të ndershme janë prioriteti kryesor i PD.
“Shqipëria është më mirë pa Edi Ramën! Shqipëria pa Edi Ramën, me zgjedhje të lira dhe të ndershme, me kandidatë të ndershëm është ajo që kërkoj sot unë, por jam i sigurt që jo vetëm anëtarët, simpatizantët, votuesit e Partisë Demokratike, por edhe socialistët e ndershëm. Ta çlirojmë Shqipërinë nga kjo e keqe, që i ka zënë frymën, nga gënjeshtrat, nga mashtrimi, nga korrupsioni dhe nga e zeza e të zezave nga inkriminimi i pushtetit me persona me rekorde të tmerrshme kriminale.
Sot nuk është një ditë për të fërkuar duart, është një fitore e një beteje, por lufta vazhdon. Dhe lufta mund dhe do të përfundojë për të gjithë shqiptarët kur personi që ngriti arkitekturën e pushtetit të inkriminuar të jetë larguar nga pushteti njëherë e mirë me votën e shqiptarëve. Me votën e lirë dhe të ndershme të shqiptarëve, përmes një procesi të lirë zgjedhor, përmes zgjedhjeve të vërteta demokratike, të cilat janë sot e gjithë ditën prioriteti numër një i Partisë Demokratike, i imi personalisht, përkushtimi dhe angazhimi im maksimal para shqiptarëve” theksi kreu i PD.

Arben Shahini