Bylykbashi: Rama e ka hallin tek fasada dhe jo tek “mosdakordësia”

Letra e Kryeministrit Edi Rama për Kreun e PD, Lulzim Basha për dialog politik, përveç të qeshurave duket se nuk ka dhënë asnjë rezultat tjetër. Këtë e ka deklaruar vetë deputeti demokrat Oerd Bylykbashi, i cili në një postim në fb shprehet: “Si rregull, në fund të një raundi të pasuksesshëm negociate, thuhet: ramë dakord që të mos biem dakord. Kjo është shprehje e shpikur për të krijuar pozitivitet edhe kur nuk bihet dakord me shpresë për të vazhduar në raundin tjetër, ndërsa ne shqiptarët i themi: të mbajmë veten me gajret.Por letra e Ramës për liderin e opozitës ishte për të qeshur me lot por edhe për të shkulur flokët”. Sipas Bylykbashit, Rama me letrën drejtuar Bashës shkroi një kapitull të ri. Dhe manuali i ri i negociimit sipas Bylykbashit është “si të negociojmë që të mos biem dakord?” Bylykbashi: “Rama fton Bashën që “mosdakordësive” t’u jepet një “përmasë e munguar civilizimi” nëpërmjet një tryezë dialogu dhe kështu t’u mbushet mendja ndërkombetarëve se jemi të civilizuar! Pra, që në ftesë Rama e ka të mbledhur mendjen për mosdakordësinë, por hallin e ka te fasada”.